May
28
腳 un un
唔知係咪受某隻豬影響，唔知幾時開始有時得閒就會腳 un un。
我唔認為 un 腳美觀，大庭廣眾下，如我知道自己無意地 un 腳，我會用意志力制止。但其實， un 腳係咪本質上就係「肉酸」，我相當懷疑，只不過可能好多肉酸既人習慣 un 腳，然後人既氣質就影射到動作上。講真，un 腳的確可以帶黎少許快感，亦好似會令時間過得實淨Ｄ。
un 腳唔完全係一個非自主動作 ( involuntary action），如果有人要 un，其大腦就必須由衷地作出第一次命令。un 腳既理由係咩，我唔肯定，但眼見男性年紀愈大， un 既頻率就愈高；而所謂既「身份」愈低微，愈 un 得大力﹣﹣奇怪既係，大家都會覺得理所當然。
如果話 un 腳係男人既浪漫，我相信會令人以為「浪漫」呢回事男人係天生缺乏。我唔係要為 un 腳平反，只係想話若果某一日你同一個陌生男人同坐一架巴士或火車，而又若然佢既振動令你不快，請唔好立即用不屑眼光回應，因為佢只係用自己既方式生存。社會上有好多好多 un 腳者，但一個人 un 腳唔代表佢只係識 un 腳，只係因為佢地既行為不夠堂皇，每每令其他人輕輕帶過不留一點心，事實上佢地不過係唔識用其他行為去取代 un 腳呢個習慣。
如閣下以為 un 腳者肉酸，唔好忘記他日你都有幾會變得麻甩；就算你唔麻甩，你既愛人家人朋友都係變得麻甩；就算佢地都好高尚，請注意呢個世界依然有好多人麻甩，可憐既係，你唔可以完全脫離呢個世界。哈！
